مكتب السيراميك للفتوى


طبعا … وكما هو ملاحظ أني سرت أتغيب كثير عن مدونتي وعن التدوين


وهذا بسبب عمليات النقل اللي بشرف عليها لمنزل خالتي وجدتي … عقبال عندكم


اللي لفت انتباهي هو موقف سرلي اليوم الصباح …


نقص علينا السيراميك ورحت أطلب زيادة


فقلي الرجال تعال بعد العشا …


طبعا مني فاضيلو اجي وقت ما يحب


حيتو ثاني يوم الصباح ودخلت وسلمت


ما تصدقو يا جماعة … تقولو دخلت حلقة ذكر … ولا مجلس علم ما كأنو محل سيراميك


الناس متجمعين حول الرجال … ويسألوه في الدين ويفتيهم


وطبعا الرجال مصري ودقنو الى السرة


وجا واحد يسأله عن حكم الجواري … وهذاك يفتي … وواحد يسأل عن حكم مني عارف ايش


ولما شافني الاخ … طالع فيا وقال … فينك امس ؟ ليه ما جيت ؟ انما المسلمين على وعودهم !!


قلتلو … تباني اوقف عندك ولا اوقف في البيت على العمال ؟


قام سكت شويا كدا واتصل على واحد يشوف السيراميك


وانا جلست واسمعو يكمل في بحر الافتاء


اللي يسمع يقول ما شاء الله


لكن اللي يدقق يعرف ان الرجال يقول كلمتين صح ويقعد يتفلسف ويغلط


وبعد 10 دقايق طلع السيراميك موجود


وحطيت السيراميك في السيارة وجا يكتبلي الفاتورة


بعد ما سجل كل حاجة


طالعت في السعر … واستغربت


خرجت الفاتورة القديمة


ومن يوم ما شفتها … والله الرجال وجهو اتلون


وطالع فيا كدا ويقول … الله … دنا نسيت احسبلك السعر الصح


وقعد يعدل في الفاتورة


وانا ماسك نفسي من التخلف اللي بيسير


بعد ما اخذت الفاتورة رجع اخونا في الدروس الدينية حقتو


قمت سالتو ؟ هل الغش من الاسلام ؟ ومشيت …


مشكلة اذا واحد يتظاهر بانه متمسك بالدين لاخر درجة … واعمالو كلها حرام في حرام

Advertisements

2 تعليقان

  1. لا حول ولا قوة إلا بالله… فين أبو سالم عنه هذا؟؟ 🙂

  2. ههههههههههههههه

    أبو سعد …

    كنت حشتكي الرجال هذا عند ابو سالم بس بصراحة خفت على السيراميك اللي في المحل

    هههههههههههههههههههه

    انا فكرت فيها وقلت ايش ذنب السيراميك يتكسر مع راس الرجال ؟!

    نورتنا يا ابو سعد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: