الفساد في قلوبنا


كان باقيلي 6 ساعات على اختبار الرياضيات الأخير في الجامعة


ومريت على واحد حبيت أسلم عليه


دقيت باب الغرفة


طاق طاق طاق


محد رد


طاق طاق طاق


فجأة ينفتح الباب والولد مفجوع >>> والله دقيت بأدب


سألت الولد شكلك نايم … اشبك كدا مخبط ؟


الولد : فيك من يكتم السر ؟


أنا : خير ان شاء الله


الولد : ادخل


دخلت وانا افكر … خير ان شاء الله ايش ممكن يكون موجود ؟


دخلت الغرفة وطالعت فيه


قلي افتح النور


فتحت النور


واحاول ادور على السر هذا


طالع فيا … وقال : سقاف ليه ما تجلس ؟


رحت ببراءة وجلست


وقعد يتكلم ويدخن


شويا اسألو ؟ فين السر دحين ؟


طالع فيا وأشر على السجارة وقال : شوف


أنا ( مسوي نفسي مستهتر بالخراب ) : ايش الجديد في الموضوع ؟


الولد : شوف انا عارف ان ثلاث أرباع الأولاد يحششو … لكن انا ما ابا احد يدري عن الموضوع


أنا : هاه حشيش ؟ … طيب ايوا كمل كيف اختباراتك ؟


الولد رجع يكمل وانا مو مصدق … حشيش ؟ معقولة هذا الولد وحشيش … انا اعرفو مأدب ودافور


بعد ما خلص الحشيش طلع علبة وخرج منها ورقة ورص فيها حشيش ولفها ورجع يدخن


انا طالعت هنا وقلت لا شكلو من جد حشيش


لا تخافو ما كانت اول مرة اشوف الحشيش


اصلا اعرف اشخاص باساميهم الكاملة حششو بالغلط … لحد يسألني كيف


لكن زعلانين ان فلان ضحك عليهم وخلاهم يحششو … مع ان فلان ماله دخل


ليه كتبت لكم هذي القصة ؟


لأني لما حكيتها لجدتي انفجعت … وحسيت انو اخيرا عندي شي جديد


لاني كنت كل ما اشوف شي غلط واتكلم عليه يقولولي انتا قديـــــم


خلوني اقلكم موقف صغير سار اليوم


كنت بوصل أمي مدرسة


وصلت المدرسة ونزلت ودخلت ورحت البيت


اتصلت عليا وقالتلي تعال


لما قربت من المدرسة


ماشي في أمان الله


وشويا اشوف بنات قدامي يصرخو


آآآآآآآآآآآآآآآآآه … آآآآآآآآآآآآآآآآآآآه


ووحدة تدف الثانية والثالثة تبكي والرابعة يدها على قلبها


وانا مفجوع … ايش القصة ؟ مضاربة بنات ولا ايش ؟


المهم البنات في نص الشارع


وقفت استناهم يوخرو


بعد خمسة دقايق استوعبت ان البنات خافو لا اكون دعستهم بالغلط


لا حول ولا قوة الا بالله


وقفت عند باب المدرسة وكلمت ماما


ماما انا خلاص وصلت … هيا يلا طالعة


شويا اسمع بنات يصرخو


هاه هاه هاه هاه الله يرجك يا سمية كدا كتبتي في السؤال التاني ؟ في وحدة تكتب رقم جوالها في السؤال التاني ورقمها هوا %^$#@#@


وتجي وحدة دوبها خارجة من الباب وتزعق


أما عاااااااااااااااااااد الشلة الموقرة … ها كيف كان التفحيط معاكم ؟ انا بالقوة مسكت الطارة في السؤال الاخير


وشويا الاقي حارس المدرسة نط فوق سيارتي … طالعت فيه وسلمت وسبتو


بدا الرجال يدور حولين السيارة … شكلو يبا يشتريها ولا شي


المهم أمي خرجت ما اتاخرت


ركبت السيارة ودار بيننا الحوار التالي


أنا : ماما … كيف اعرف البنت في اي مرحلة ؟

ماما : عن طريق المريول

أنا : كيف المليور دا >>>معليش ما عندي اخوات واول مرة اسمع دي الكلمة

ماما : ازا كان اخضر يعني ابتدائي

والبني يعني متوسط

والكحلي يعني ثنوي


أنا : متاكدة ؟

ماما : ايوا ليه ؟؟


انا: انتي ما كنتي في مدرسة ابتدائي ؟

ماما : ايوا

انا : طيب شوفي البنات ملايرهم بنية

ماما : يكونو متوسط ومخلصين

انا: بس شوفي كاشفين شعورهم

ماما : قول يا لطيف يا ولدي وامشي

انا : يا لطيف يا ولدي وامشي


بصراحة … في مواقف كثيرة تؤلم الواحد وتخليه يتسائل … ايش معنى التربية عند آبائهم

Advertisements

16 تعليق

  1. أنا أخص منك.. ما عندي جديد أبدا.. 🙂

  2. نجاة …

    قولي الحمد لله

    في ناس كل جديد عندهم شي يخوف

    حوادث – وفيات – جرائم … الخ

    تقولي جريدة وطنية

    الله يبعدنا عن الشر والمصايب

    شكرا لمرورك وردك

  3. لا تستغرب في دا الوقت من الزمن كل شي ممكن يصير لو تسمع حوادث واشياء ما يصدقها عقل الله يحفظ اولادنا بس

    بس ضحكتني لما قلت يالطيف ياولدي وامش (ملاحظة امش بحذف الياء لأنها مجزومة)خخخخخ عربي مافي فكة

  4. كماااان

    بعد ما عصرت مخي وطلعت دي المواقف تقوليلي لا تستغرب في دا الوقت

    >>>تحطيم

    هههههههههههههه

    وعلى الخطأ الاملائي …

    تري كنت أكتب باللغة العامية وليس بالعربية

    ولسة مو مصدق انو عندك بكالوريوس عربي

  5. ليش يعني مو مصدق ؟؟!!!

  6. خليني أفكر من فين أبدأ…

    أبدأ بالــ ألغاز اللي تكتبيها ومحد يفهمها وانتي تشوفي ان المعنى واضح ؟

    ولا باستخدامك القليل للغة العربية الفصحى ؟

    ولا بالأخطاء الاملائية الكثيرة ؟

    أقلك خلاص يكفي

    أخاف تزعل علينا أبلة ملاك وتحسبني مستقعدلها

    بصراحة احس اسلوبك بسيط جدا … أسلوب بنت في ربيعها الـ 17

    مو ما شاء الله أم لطفلين

    وأكثر اللي اعرفهم دارسين اللغة العربية يكونو اتأثروا مرة بدراستهم

    الكلمات الفصحى تدخل في الحوار لا اراديا

    غير كذا من أكبر الجرائم عندهم ابدال الحروف … يعني الذال ما تكون دال … حتى لو كانو مكاويين الى النخاع واللهجة ما تفارقهم

    ممكن دي هيا الاسباب اللي تخليني ما اصدق 🙂

  7. يا صاحبي هو تشوف ضياع الشباب و التحشيش و الشراب

    و لا مرقعة البنات و الصرقعة

    و الله وين ما تطل تجرح قلبك … إزا عندك واحد

    مشي حالك بس

  8. مو عاجبك يعني؟؟؟؟
    اصلا انا اكتب بالعامي فماله دخل بالفصحى ..ولمن اكتب بالفصحى داك الوقت تعال أحكم

  9. شكسبيرويه

    وحشتني ياخي

    فينك يا هو ؟

    المهم بس حبيت اقلك معلوومة

    الحشيش والمخدرات مو بس في جامعتنا

    حتى في مدارس الاولاد … والبنات

    انا استغرب كيف الحشيش موجود في المدارس اللي هيا دار العلم …

    وعلى قولك … مشي حالك

  10. ورد …

    آسف ماما

  11. قول يالطيف ياولدي وأمشي 🙂
    نرجع لصاحبك اللي يحشش .. مع أني كنت زمان أحسب الحشيش لطبقة مرة فقيرة .. طلعت أنا الفقيرة ف أفكاري .. !
    صاحبك دا شكله ماعنده أي قيمة تمنعه من أنو يسوي حاجة زي دي غير كلام الناس !!
    الله يهديه ويصلح أمره ..
    الا الحشيش مفعوله زي ايش بالزبط ؟؟
    ..
    بالنسبة لبنات المدرسة ..
    شايفين زيهم كثير للأسف .. ومااعرف هما تحلالهم الهبالة قدام الأولاد ليش .. ياامي اذا مررة حبكت يعني خلاص أرمي الرقم بدون البلاهة اللي انتي فيها .. عالاقل يعرف اللي قدامك بيكلم بنت زي الأوادم مو بزرة !!
    بس ايش نقول .. مراهقين !!

  12. ايانق …

    لعلمك انا مرة سويت استفتاء وسألت ملايين البنات >>> طبعا مو ملايين بس عدد كبير

    سألتهم عن حاجتين في مدارسهم هل هي موجودة ولا لا ؟

    وحدة منهم كانت المخدرات

    وصدقيني من مختلف المدن والمناطق والمدارس سواء حكومية اهلية طبقات راقية طبقات فقيرة

    كان موجود في المدرسة ومنتشر

    بصراحة هذا الموضوع مسببلي استياء كبير جدا

    وكل ما اكتب عنو ما اعرف من فين ابدا

    المهم يا هند … هوا ما وقف على صاحب واحد … اصحاب كتيرين ربي يهديهم

    عاجبهم الحشيش انو يخليهم مسطلين

    الله لا يبتلينا

    وبنات المدرسة

    والله ياهند انا سالت السؤال دا لامي عشان ابا اعرف دي الحركات حقت اي بنات

    وكنت اشوف المتوسط صغار

    الا طلعو ابتدائي !!

    لا حول ولا قوة الا بالله

    انا شايل هم الاسبوع الجاي … اخر اسبوع امي حتروح فيه مدارس

    الله يعين ويسهل

  13. صبآحك ~ مسآءك سعاد
    …….. 🙂
    اجواء الاختبآرات ابعدتنا
    لكن عُدنا بأمل مشآهده كل مآهو جديد مـنك
    أولآ ~ مبروك فتره انتهاء الاختبآرات >> عرفت عشان ولد خالها يدرس هناك
    وثآنيا ~ ان شاء الله ناجح ؟
    ونبدأ في الفسآد
    قصدي في موضوعك المطروح هنآ
    قبل لـ أدخل في عالمك الرآئع
    لنقولها معآ
    ..][ اللهم عآفهم ممآ أبتليتهم فيه][ ولآ تبـــــــــــــلآنآ
    صآر الواحد يحشش بالغلط > يعني وين عقله
    سمعتهآ وقت كثير
    فلآن طآح بالحشيش لكن بالخطآ ؟
    مؤلم ان نقول بالخطآ
    يعني يوجد احد رفع العصآ على وجه وقال حشش
    الموضوع هذا يرجع للآسف
    لشغله وحده أهي ..}{ ضعف الوازع الديني }
    وعدم المحافظه على الصلآه
    وألكل يعرف ان الصلآه تنهى عن الفحشآ والمنــكر
    عمومآ أخوي عبدالرحمن
    بلآوي السكن في الجآمعات كثيره
    سواء كان سكن بنات او سكن اولآد
    فلآ أملك الا دعوه من قلب أخت
    ..}{ الله يحفظك ويحرسك ويبعدك عن كل أمر ذي سوء او يمسك بسوء}
    والموضوع الثآني
    البنآت ونقووول الله المستعآن
    رآح الحيآء في مهب الريح >> وهنآ أكتفي تعليقآ
    فخير الكلام ما قل ودل >> لكن غصب اسرح وانا اكتب

    دمت رائع ايهآ الفتى

  14. أهلا وريف 🙂

    زمان عنك

    نورتي المدونة

    والحمد لله خلصنا اختباراتنا والنتايج الى الان مشرفة ولله الحمد

    بالنسبة للي يحششو بالغلط …

    فهذولا يكونو مدمنين دخان

    واذا شافو سجارة ملفوفة يجي على بالهم ان اللي داخلها تبغ والتبغ حق اللف يكون اقوى من التبغ العادي

    يسأل اصحابه ؟ هذي سجارة ولا حشيش ؟

    يردو عليه وهما يضحكو حشيش

    يحسبهم يمزحو ويدخن

    يكتشف ان الموضوع حشيش

    يبدأ الندم والادمان في نفس الوقت

    هذي هيا الطريقة العامة للاشخاص اللي اعرفهم

    طبعا الوازع الديني يلعب دور كبير

    وللاسف الحال سار شي يبكي …

    وبالنسبة للبنات

    فامس امي دخلت المدونة وقريت هذا الموضوع

    وقعدت تحكي جدتي عن اللي سار … طلعت انا مو منتبه لشي

    البنات كانوا قريبين من السيارة وقاعدين يتلكعوا ومني عارف ايش ومو من عادتهم

    انا كنت احسب هذي عادتهم يطلعو ويصرخو في الشارع

    لا حول ولا قوة الا بالله

  15. السلام عليكم

    الصراحة الموضوع اكثر من رائع

    بس انا حبيت اعلق على حاجة

    انا شايف اغلب الردود جلست تحكم على الشاب اللي يحشش وكان الشاب سئ باصله

    اللي حاب اوضحو انو التحشيش غالبا يكون ردة فعل اكثر من فعل بذاته

    يعني ما اقدر احكم على الشاب الا لما اعرف السبب اللي خلاه يحشش لانو بمعرفت السبب انا اقدر اشوف الصورة

    الكاملة اللي تمكني من الحكم عليه و الا حيكون حكمي ظالم

  16. وعليكم السلام يا س

    شكرا لك على تكرمك وردك

    طبعا يا اخي مافي أحد سيء بطبعه

    وكل انسان فيه جانب سيء وفيه جانب حسن

    الناس لما تاخذ موقف من الشخص اللي حشش ما يكون الموقف شخصي

    يكون الموقف بسبب ان الشخص اللي حشش كان اضعف من الظروف

    وبدال ما يحاول يلجأ لحلول سليمة

    لجأ للغلط مع الأسف

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: