ذكريات المدرسة


تم تمرير الواجب من قبل مضيعة

>>>شكرا لها بس احس ايام المدرسة سرلها فورمات

1- أفضل مرحلة تعليمية درستها ؟

الروضة …والثانوي


2- أسوأ مرحلة تعليمية مرت عليك ؟

الابتدائية

3- أفضل المدرسين اللي مروا عليك ؟

في مدرسين كثير

عبدالمحسن الصاعدي (عربي ) – طاهر مرشنت ( انجليزي ) – صالح الغامدي ( رياضيات ) – منصور أبو دقنة (جغرافيا ) – محمود مطر ( حاسب )

عبدالغفار خوج ( فيزياء ) – سامي الثقفي ( رياضيات )

>>>عندي ثقب في الذاكرة مو قادر أتذكر اسماء كثيرين

4- أحب المواد اللي درستها ؟

التعبيـــــــــــر

بصراحة دفاتر التعبير متألم الى هذا اليوم أنها اختفت

وكنت أنقهر من المدرس اللي يقرى مواضيعي ويقلي ابا اشق الموضوع هذا .. وهذا .. وهذا … وانا ساكت

اخر شي يقلي … اقلك انا حاخذ الدفتر حقك ممكن ؟

كنت احب اطلع واقرى مواضيعي قدام الناس والفصل أنواع الضحك من الاسلوب الساخر

والمدرس كان يعصب … وأنواع الضرب

والفنية نفس الشي … أحب أرسم بشكل عام والفنية كانت تساعدني

بس قهر لما يجو المدرسين ياخذو الأعمال الفنية ويعلقوها في المدرسة وكل مين يجي يكب عليها بيبسي ولا مويا

في مدرس الله يذكرو بالخير كان اسلوبوا ممتع في حصة التاريخ

ويسأل أسئلة من برا المنهج ,,, وانا اجاوب لاني اكون داخل جو مع الموضوع

اما الطلاب الباقين يسموه أبو النوم لأن صوتو واطي جدا جدا جدا

حبيت التريخ كثير معاه

طبعا ما ننسى الحاسب

كنت أنا والشباب الله يذكرهم بالخير

نجلس ونتحدى بعض مين يخلص أول واحد أسرع

طبعا الدروس كانت كيف تشغل الجهاز وكيف تقفل الجهاز وتكتب على الوورد وغيرو

طبعا احم احم انا اللي كنت دايما افوز

5- أكره المواد اللي مرت عليك ؟

الجيلوجيا >>> مادة كل ما اذاكرها أضحك

غبية جدا هذي المادة

يتكلمو عن العصور كأنها كانت امس ولا قبل أمس

العصر الكامبري أتكون قريب جدا قبل 15 مليون الف سنة فقط … وأبرز الحيوانات اللي كانت فيه …الخ

كنت أكره مادة الانجليزي بسبب مدرسها … طبعا درسني ترم وكان اسلوبو غير تعليمي

يخلينا نحفظ كل شي في الكتاب

ويجي يقول لواحد … سمعلي قطعة الملك عبدالعزيز

طبعا انا دايما واقف واقلوا ما احفظ وهذا مو اسلوب تعليمي

طلعلي ورقة من جيبو من جريدة قبل الميلاد يقول شوف القواعد وحفظ الكلمات الانجليزية اساس تعلمها

استمريت على نفس الحال لين ما سار يخليني اقول القطع بالمعنى >>>استسلم

غير كان عندي مدرس كيميا الله يسامحو

يعاملني كأني غبي

كل ما سألت سؤال يقلي مو لازم أجاوب عليك … اصلا مح تفهم

مرة شرح درس اظن المولالية والمولارية

وبدون مبالغة محد فهم الدرس

سأل … يا شباب مين ما فهم الدرس حق اليوم ؟

والله يا جماعة اكثر من ثلاث أرباع الفصل رفعو اياديهم

قال الصفين اللي ورا غلطتهم دايما يتكلمو ويلعبو ومهملين ما تفرق

والسقاف دايما يسأل ولا يفهم

ومدري مين أول مرة يسأل مافي داعي اجاوبه

وعلى هذا الموال

لين ما بقي طالب في الصف الأول وكان مصري دافور

طالع فيه … وقال تعلي المكتب اشرحلك مافي داعي اضيع وقتي واشرحها ثاني

قام سأل المصري الثاني … قلو انتا فهمتها من طريقة شرحي ؟

قلو لا اخذتها في مصر من زمان فعارف كيف تنحل

>>> مدرس فضيحة الصراحة

6- آخر شهادة علمية حصلت عليها , وتخصصك ؟

الثانوية العامة – تخصصي هندسة كهربائية جامعة الملك فهد للبترول والمعادن

7- أطرف موقف مر عليك في دراستك ؟

ايام المتوسط كان عندنا عريف حاط نقرو من نقري ( دوبو من دوبي ) وانواع كتابة الاسم والصليب على قولو

وانا انواع التنقيص في الدرجات …أصلا المدرسين ياخذو الاوراق ويرموها الا اذا كان في اسم واحد ما يطيقوه

المهم جا صاحبنا ووقف عريف ولسانو وصخ ما تبقى كلمة وصخة الا يقولها

اخر شي طرطعت وقلتله احترم نفسك

قام صاحبنا اداني كف

طبعا طرطعت أكتر … لكن اذا واحد ضرب العريف كف الله يعين من المشاكل اللي تسير مع الادارة

رحت اشتكيت وعملت لكن مافي فايدة حتى للمدير

اخر شي كتبت شعر هجاء

عريفنا خريفنا ونحن في الشتاء … عريفنا ظالم ونحن الشهداء

طبعا الفصل حفظها وكل ما كلم احد قالولو هيا

وجا مدرس وسمعها وقال ايش هذا ؟

قالولو السقاف كتبها

قام طلب مني أطبعها بالكمبيوتر

رحت وطبعتها وكتبت فوق سبب القصيدة هجاء للعريف فلان بن فلان

واخذها المدرس وعلقها في المدرسة

والولد الله لا يوريكم

8- أصعب موقف مر عليك في دراستك ؟

اممممم

في الابتدائية

فقشت راس اتنين … واحد منهم مرتين

المشكلة ما كنت قاصد

واحس راسهم زي قشرة البيض من اي شي ينزل الدم

>>>حسيت اني مجرم

هع هع هع

أمرر الواجب الى :

وسيم عازب – أيانق – بنات الهيشك بيشك

Advertisements

13 تعليق

  1. 😐 اجل عطوك كف يا سقاف .. افا المفروض تشيل الطاولة وتكفخه فية وبعدين اهو يضربك وتتضاربون
    عيب والله عيب تتهاوشون وانتم اصدقاء >> اسلوب امهاتنا :d

    بس انتبه لاتكمل مسيرتك بالشعر ما اتوقع بيكون لك مستقبل 🙂

    تمنياتي لك التوفيق وعقبال الدكتوراه يارب :d

  2. يا ليل يا مضيعة ليه الخط صغير ؟

    المهم بطلنا من زمان الشعر ما يحتاج تقولي

    وبعدين هذاك ايام المتوسط لما كنت أليف

    الله يرحم ايام زمان 🙂

    شكرا على الواجب … وشكرا على الرد

  3. ياساتر عليك ..
    فقشت روسهم ولسه تقول حسيت اني مجرم ..ههههه شرير

    اما المدرس الي شايف نفسه ذكي..يرفع الضغط انا لو منكم كان نسمتله كفراته هههههه

  4. يا لطيف يا ورد

    شايفتيني شرير انسم الكفرات ؟ هذي أرواح حرام عليكي

    اما فقش رؤوس الأولاد عادي دايما فاضيه بعكس البنات اللي رؤوسهم مليانه بالاحلام

    هع هع هع بدينا نتكلم في السياسة

  5. لالا ابداً مو شرير في فقش الروس
    تنسيم لكفرات ماراح يسوي لروحه شي اصلا ما ارح يقدر يمشي بالسيارة لووووول

  6. ورد …

    الحمد لله أني مو مع اولادك في المدارس

    اظنك لو كنتي أم واحد من اللي فقشتهم كان اندعى عليا لين ما اقول امين

    الاولاد اللي فقشتهم كان الموضوع عادي مرة حتى ابائهم ما جو المدرسة بس اخدهم المرشد الصحي العيادة ولف الشاش على راسهم وكم خيط وابرة وانتهى الموضوع

    بس اذا حطيت عقلي بالمدرس ونسمت كفراتو وما انتبه ومشي بالسيارة ممكن تنقلب السيارة ويموت

    وحسير قاتل وسفاح

  7. اممما انك مجرم >>> فقشت اتنين !!!

    انا اعطيك درجة مشاغب مع مرتبة الشرف الاولى خخخ

    بس اهم شي عقلت دحين ولا لسه خخخخ

    اصلا انتو الشباب عليكم حركات >>>مايسلم منها صغير ولا كبير 🙂

    يلا بكرة تحكي عيالك وتقلهم انا كنت طالب مثالي وحالي حال نفسي وكنت دايما اطلع الاول وووو >>> كل المثاليات تطلع والبلاوي دي تقعد تحت اللحاف خخخ

    ضحكت والله وانا اقرا ذكرياتك 🙂

    الله يبلغك التخرج والمكانة العليا في الدنيا والاخرة

  8. والله حسيت انك مجرم يا السقاف..

  9. مروج …

    آمين يا رب

    انا افكر جديا أني أقفل الموضوع دا وما اخلي أحد يرد

    كل مين دخل واتهمني بالاجرام

    ويا مروج لا تخافي دحين أنا عــــاقــــل >>>بــــايـــــن

    ولا تخافي ما راح أبكش على اولادي واقلهم كنت الطالب المثالي … لان مافي أمل يصدقوا

    حقلهم جربت العربجة وما فادتني فوفروا على نفسكم الطريق >>> مدري ليه احس اني مح اقدر اسويها

  10. محمد بن سالم …

    أول شي تحش سيارتي … تاني شي جاي تقلي مجرم

    احس ان القائمة السوداء بتستناك بفارغ الصبر

    >>>كيف ما يجي اسوي نفسي معصب ؟

  11. يا السقاف

    الله يوفقك شفت تعليقاتك

    وبما انك من طلبتي افتخر بك

    وعقبال الدكتوراه

    افتكرك بس الشقاوة اللي ذكرتها فيك اكتر مما كانت في الواقع

    مهما يكون كنت مؤدب وعلاقاتك مع زملاءك جيدة

    لك تحياتي

    • شهادة أعتز فيها بصراحة

      وخصوصا من الأستاذ اللي كنت أكثر من تصرفاتي الخاطئة في حصته وما شفت منه غير الصبر وطولة البال

      بصراحة يا أستاذ طاهر دايما يجيني تأنيب الضمير على الأفعال الخاطئة اللي كنت أمارسها في حصتك … وانت الأستاذ الوحيد اللي يجيني نحوه هذا الشعور

      الحمد لله ان درسني شخص من خيرة المدرسين ومن اللي يبحثوا عن مواهب طلابهم ويتبنوها

      جزاك الله خير يا أستاذي … وأنا سعيد جدا بزيارتك وردك المتواضع

  12. […] أحدث التعليقات صارخ بصمت on أستاذ أم دكتور ؟صارخ بصمت on أستاذ أم دكتور ؟صارخ بصمت on أستاذ أم دكتور ؟صارخ بصمت on ذكريات المدرسةصارخ بصمت on أستاذ أم دكتور ؟صارخ بصمت on 3-أبو سداح وشريفةصارخ بصمت on 4-أبو سداح وشريفةام رغد on 3-أبو سداح وشريفةطاهر مرشنت on أستاذ أم دكتور ؟طاهر مرشنت on ذكريات المدرسة […]

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: