ملاحظة … أبطال هذه القصة أناس حقيقين …
الأول :
أنا : مبروك السيارة
هو : انا ما أبا كورولا …
نص العالم عندهم كورولا وصغيرة ولا تعجبني ..
أبوي غصبني على سيارتي ولو جبلي اي شي غيرها كان أحسن
الثاني :
أنا : يا أخي ليه انتا مهمل سيارتك وطايح فيها تفحيط وما تصلحها ؟
هو: مغصوب عليها …
صح أنها كامري …
وممتازة وكل شي
بس أنا نفسي في أكورد …
والشايب معند …
والواحد اذا ما حب سيارته ما راح يعتني فيها
=====================
الثالث :
( وانا اوقف سيارتي أشاهد منظر تلك السيارة لكزس GS وصاحبها يفحط بغباء بين مواقف السيارات)
سألت صديقي : يا اخي ليه ما يقدر النعمة ؟
صديقي : هذا فلان … وكان يتمنى أبوه يغيرلو السيارة هذي السنة بلكزس الجديدة LS لكن أبوه ما غيرها له الى اليوم !!
================================
الرابع :
هو : يا أخي طفشت من سيارتي ( لكزس LS )
أنا : ليه ؟
هو : نفسي أشتري الـ BMW والله مافي زيها … اللكزس ياباني وزبالة
=======================
الخامس :
هو : ما باركتلي على السيارة !
أنا : معليش … حسبت ما تفرق معاك …
ألف مبروك والله يعطيك خيرها ويكفيك شرها
هو : الحمد لله رب العالمين … مافي زي اليارس …
صح انها اقل سيارة في تويوتا لكن مريحة وعملية الف حمد لك يا رب
صح ما كانت عاجبتني في البداية بس دحين خشت مزاجي
أنا باستغراب : الحمد لله!
======================
ليه كثيرين ما يعرفو ايش هيا القناعة ؟
Filed under: صرخة مجتمع
الحمدلله على اللي احنا فيه والشباب هذولي الله يهديهم
ولما تروح منهم يتحسفون عليها ولا يشكرون ربهم ولا شئ ..
بشر غريبة …
ياخي و الله من جد الواحد ما يحس بقيمة الريال و بتعب ابوه ( أو أمه ) لين ما يحط من جيبه الا ما رحم ربي
الحمد لله على النعمه
و في الاخير بني ادم ما يملي فمو غير التراب
ياما وياما شفنا نماذج من دول الناس ..
أفتكر قبل فترة وحدة زعلانة .. ليش يااختي ؟ تقلك هيا ماتبغى تسافر جنوب أفريقيا هيا طفشت من دي البلد !!
غيرها مايعرف جنوب أفريقيا .. وغيرها ماعنده جواز سفر أصلاً ..
الحمد لله بس ..
اللهم لك الحمد حتى ترضى و لك الحمد بعد الرضى ..
سبحان الله .. ما نقدّر النعمة الا بعد فقدانها ..
للأسف البعض يعترض ع خلقته قبل اشياءه !
موضوع في الصميم ..
صحيح القناعة كنز لا يفنى
والله ياصارخ صار الغالب زي مانت بتقول
تلاقي الابو مسكين يا اتسلف ولا اخد اقساط على اكتافه ولا ضيق على نفسه عشان يشتريله السيارة وفي النهاية بكل بساطة يقعد الولد يفحط ويسرع بيها وكمان فوق دا يقلك اصلا مو عاجبتني ..
الواحد بس اش يقول غير الله يهديهم ويقنعهم
والله لو هو اللي تعب ودفع من جيبه كان أعجبته وحمد ربه
بس تلقى أغلب الساخطين عالنعمة ياقرض مو داري في أي داهية راح يحطه ولا أبوه ولا أمه المساكين هما اللي مشترينها
مو الكل لديه القناعه
لان الققناعه كنز
وهل الكنز يمتلكه الجمييع
وتر … الله يهدي الجميع …
ولا يحرمنا من نعمة القناعة
أهلا مضيعة
كنت أناقش واحد … قصته غير هذي القصص
وسيارته غالية جدا ما شاء الله
ومع هذا يبا يبا يشتري الموديل الجديد 2009
مع ان السيارة نفسها مافي فروق كبيرة حتى نفس الشكل
ومع هذا يقلي يا اخي البني ادم ما يملا عينه الا التراب !!
ملاحظة … سيارته سعرها أعلى من نص مليون بكثير !!
هلا شكسبيرويه
وحشتني يا اخي
مع الاسف من بين اللي كتبت قصصهم اللي هوا يشتري سيارته بنفسه وموظف قد الدنيا
مع الأسف المشكلة سايرة في القناعة
والواحد مهما كان عنده يطالع بعين النقص مو بعين الشكر والحمد
الله يرزقنا القناعة
أيانق
نورتي يا اختي
طبعا السيارات مثال بسيط للي يسير في الواقع
وعندنا أمثلة على السفر والأكل و اللبس وغيرها
مشكلة هذولا الناس … أنهم أفقر من حقيقتهم بسبب انتقاصهم لذاتهم
وانتقاصهم لذاتهم … يا حيجرهم للطمع والجشع … او للكفر بنعمة الله
أظن الطريقين هذي كلها نفس الطريق
الله يكفينا الشر
ذات الشمم …
نورتي المدونة..
بالنسبة للي معترضين على خلقتهم طايحين في عمليات التجميل
ويا ريت مقتنعين بعد دا كلو
بالضبط اللي يسير في عمليات التجميل … هوا نفسه اللي يسير في الواقع
هذولا الاشخاص أقبح من مظاهرهم
الله يكفينا الشر ولا يبتلينا
مروج …
أعرف واحد أبوه عسكري وراتبو ما يعدي 4 الاف
وعندو 5 اخوان
وابوه فرح فيه لانه دخل كلية ينبع
والولد راح وفضح ابوه في كل مكان انو ما يقدر يشتريلو سيارة
قام الاب اتسلف وكل شي وجاب لولدو سيارة واتحمل ديون فوق طاقتو بكتير
وابشرك …
السيارة انقلبت مرتين … كل منطقة فيها مصقوعه كل القطع اللي فيها خربانه مع انها ما غلقت سنة
لا حول ولا قوة الا بالله
أهلا باللي عايشة في حلم
اخالفك الرأي …
في ناس يشترو السيارة بفلوسهم وعرق جبينهم ومو عاجبهم
للاسف القناعة في القلب
ما تعرف الشي اللي قدامك هل هو هدية ولا من عرق جبينك
اذا راحت القناعة جا الطمع والجشع … وسارت الانانية هيا اللي مسيطرة على الشخص
الواحد يقول يا لطيف … والله لا يبتلينا …
امراض زي هذي … تمسخ القلب وتلوث المشاعر
شكرا لمرورك
أهلا سمنتومه
القناعة كنز … اتفق معاكي
لكن هذا الكنز موجود في قلوب الجميع
مجرد لازم نبحث عليه في طياتنا
واذا لقيناه كنا اسعد الناس
ما اقول نرضى بالقليل … لكن اقول … نكون معتدلين ونرضى بحالنا ونحمد الله عليه
الكفر بالنعم يجيب سخط الرب
الحمدلله على كل حال
لكن برضو مو معناتها الواحد ما يطمح للأفضل
المفروض يخلي ظروفه دافع له عشان يوصل للي يبغاه بدون تشكي وتبكي وطرارة من الناس ..
اصلاً اغلبية شباب دحين شباب متحلطمين ..مافي شي يعجبهم..
يقهروني لما مايقدروا فرحة آباءهم لما يجيبولهم سيارة على قد فلوسهم ..تحسهم يكسروا قلوبهم لما يبينوا لهم انها مو عاجبتهم ..الله يهدي الشباب والبنات ..صايرة افكارهم سطحية
والقناعه كنز لا يفنى ..
ومن رضي فله الرضى ومن سخط فله السخط
من جد مدري متى نعرف معنى القناعه ..
اخوي صارخ ..
زرت مدونتك اكثر من مره ..
رائعه ولاتحتاج شهادتي..
يكفي انك تنقلنا من مكان للثاني..
معيشنا مغامراتك .. وتجاربك..
لك أجمل تحيه من أختك..
حلو الموضوع ياصارخ..
بس أتوقع من خلال معاشرتي لناس زي كذا إن السبب الأول في انعدام القناعة هي التربية..
إذا الأب والأم علموا الواحد من صغروا إنو يكون قنوع صدقني يقنعوا الشي المعقول..
أنا لما جيت أشتري سيارتي أهلي طارو فيا :: كورولا !! أحد يشتري كورولا ؟؟ استنى شويا نطلعلك سيارة أحسن منها..
وأنا اللي رفضت لأنو في النهاية تعتبر سيارة ( مابها شي ) و(تأدي الغرض) في هذا الوقت ..
لكن لو كان الأبو والأم ( فاتقين ) أولادهم من صغرهم ومايفهموهم ولا يعلموهم إن الدنيا يوم ليك ويوم عليك والانسان محدود بإمكانياته ومو كل الناس زي بعض ،، وإذا الولد شاف إنو كل ما قال أبغ شي راح الأبو جبلو اياه حتى لو يتدين .. أكيد الابن حتكون عيونو ( فارغة)..
وسلامتكم
وما يملأ جوف ابن آدم إلا التراب …
في الحقيقة من يكفر بالنعمة التي بين يدية ، بأفكار صبيانية ، يدلك على أنه لم يعرق له جبين يوما ما في نيل مبلغ مالي !!
استيقظ ورأى كل شيء أمامه ، بمجرد صرخة طفل يأتيه أو بنبرة حزن أو دمعة تمساح !
لذلك التربية لها حق في توجيه هؤلاء الذين لم يقنعوا بما لديهم ….
لو حرموا منها ، لبحثوا عن الدراجة !
تقبل تحيتي
مشاري
هذيان
المشكلة ان هذولا يدورو الطريق السهل يبو الشي جاهز قدامهم وخلاص
ومهما كان قدامهم ما يعجبهم
الواحد من جد يسأل الله انو يعينو على امور دينو ودنيتو …
شكرا لك
أهلا ملاك
من زمان ما نورتي مدونتي
عاد ايش تبي نقول على الشباب الله يصلحهم >>اللي يسمعني يقول شايب
مع الاسف حاجات كثيرة تسير تدل على صغر عقل شبابنا
واللي بالتالي نقطة سلبية على تربية مجتمعنا وخصوصا تربية الكثير من الاباء ما تقدر تصمد قدام التلفاز وافكار الغرب
اتوقع اني حدخل في تفاصيل التربية والشباب أكثر في الأيام القادمة
شكرا للزيارة ملاك
وي فاتني كثير مره مره
والله غيرنا ماعندهم هذي النعمه
نقول الحمد لله على كل حال
الناس ماتعرف النعمة اللي
هي فيها الا لمن تفقدها
طبع بعض بني آدم !
كيفك صارخ ؟
بسمة
نورتي المدونة …
وشهادتك اعتز بيها
شكر خاص لك من الأعماق
وان شاء الله تبقي متابعه للمدونة على طول
شكرا لمرورك
ناندو
كلامك مضبوط
التربية هي الأساس … والوالدين هما الأساس
لما الولد يشوف أبوه اشترى سيارة جديدة وغالية
والبيت أتحمل نتيجة هذا القرار بس عشان هبقة الأب
ولما يشوف الأم تشتري أغراض شخصية وتخرب الميزانية وتزعل اذا طلبت شي وما جاها
حيحس الابن لا شعوريا بأنه مهضوم الحق ولانه الصغير ما يحق له يتكلم
وان ابوه وامه يبو يربوه على شي هما بنفسهم ما سووه
طبعا هذا اذا افترضنا ان الوالدين بيعلمو اولادهم على القناعة
في اباء يشتكو من تصرفات ابناءهم وهما ما يعرفوا ايش القناعة!!
شكرا لك ناندو
مداخلتك رائعة
أسعدني حضورك
مشاري
نورت المدونة يا أخي
أوافقك لحد ما …
لان البعض عينهم فارغة حتى لو عرف كيف جا القرش
وأعرف موظف هدم بيته وزوجته وبنته بس عشان يتابع السيارات
يشتري السيارة وبدون مبالغة ما تجلس معاه أكثر من شهرين وأطول سيارة قعدت معاه 6 شهور
وفي النهاية زوجته وبنته عند أهلها في المدينة بسبب الديون اللي عليه
العين الفارغة يا اخي أخت الطمع … ما تعرف هل هو تعب في هذا القرش ولا لا
لكن زي ما اتفضلت علينا وذكرت … ممكن لو عاش في حياة الفقر كان عرف قيمة النعمة
وممكن لا ؟!!؟
الله أعلم
لا تحرمنا من تواجدك يا غالي
أهلا أماني
نورتي …
وان شاء الله تكوني لحقتي الكثير
ونحمد الله على نعمو
أهلا ليدي …
انا الحمد لله بخير بس مشغول شويتين هذي الأيام حتى ما بلحق أرد على التعليقات بسرعة زي منتي شايفة
انتي كيفك ؟
يا رب تكوني بخير…
بالنسبة لتعليقك صحيح …
بعض بني ادم ما يعرفو النعمة الا لما يفقدوها
وبعضهم يعرفوها بدون ما يفقدوها
وبعضهم يا لطيف كافرين بالنعمة سواء فقدوها ولا ما فقدوها
وما أهلك الأمم السابقة الا انهم كفرو بانعم الله
الله يرزقنا شكرو وحمدو وحسن عبادتو
شكرا على الزيارة
بالفعل كثير منا يفتقرون لكنز القناعة
وخاصة نحن الجيل الجديد
وأعتبر نفسي أحياناً منهم
الله يهدي الجميع
تحيتي لكـ ^.^
آمين يا رب
والله يهدينا ويرزقنا القناعة
شكرا لك خلود
نورتي ..
القناعة هي الرضا التام بالموجود وعدم النظر الى ما عند الاخرين. القناعة بالنفس هي أن الانسان يكون مؤمن بقدراته وبأمكانياته وعدم التحقير بنفسه.
ارى القنآعه فن ولكن لآ يمتلكه الاغلبيه
اذ ان القنآعه رضآ والرضآ للأسف اصبح لدى أكثر الناس مفقود .
وكآنني آرى هؤلاء الشبآب ، ولآ واحـد منهم حمد الله وبدآ يفكر قليلآ بأن هنآك من يحتآج لو القليل من قيمه تلك السيآره ليسد جوعه وجوع أبنآءه وليس ليجعل السيآره عرضه للتفحيط والتنآفس المؤسف
عبدالرحمن ..}
رائع بقلمك
لك كُل وجل أحترامي
ودمت بحفظ من الله
المشكلة يا وريف … اذا كان اباء هؤلاء الشباب غير قنوعين … ويريدو ان يقنعوا ابنائهم بالقناعة بالصوت والقوة
ما أظن حتفلح هذه الطرق
ولو الكل فكر ان هذا قدر وهذه نعمة من رب العالمين
كان اتغير الموضوع
لكن الناس مازالت مسيطرة عليهم فكرة المظاهر
وفكرة معاك قرش تسوى قرش … ما معاك شي … ما تسوى شي
الله المستعان …
الله يهدي الجميع
شكرا لك وريف على الاطلالة البهية
يا اخي سيبك من موضوع القناعة
نرجع لموضوع الكوكو
ليييييييييييش ما حطيتها بدل اليارس
برضه انت تعرف واحد يعشقها وما يبى يبدلها بـ 2009
ايوا اعرفو الله يستر عليه ولا يفضحو
بس عجبني واحد عندو يارس ومبسوط عليها اكتر من اخوه
هع هع