يا جماعة مو معقول…!
لما كنت في الجامعة … أسمع اثنين من الشباب طول الوقت في القهوة والسبب انهم يتابعوا لميس ومهند ونور ومدري مين
أسالهم كيف القهوة ؟ يقولو زحمة مرة بالزبط زي لما تكون في مباراة !!
طيب انتو طلاب جامعة وعندكم اختبارات نهائية وقاعدين تتفرجو على مسلسل هوا دا وقتو ؟
يقولوا … والله مسلسل تركي ممتاز وحلو >>>الخ من الحوار اللي يرفع الضغط
ولما رجعت مكة كانت جدتي عندنا في البيت وانا كنت نعسان وتعبان ونمت على طول
وكنت في حلمي اسمع اصوات لميس او نور ومهند
زهقت حتى في احلامي موجودين ؟
ثاني يوم اتفاجأت اني غلطان هذا مو حلم انا كنت نايم وهما يتفرجوا ومعلين الصوت
يا عالم والله كابوس
جدتي تتابع المسلسل وأمي تتابع المسلسل وأخويا الصغير (عمرو 13 سنة ) يتابع المسلسل
شغالتنا تخلص شغلها من بدري عشان تتابع المسلسل !!
لما أوصل أخويا المدرسة الصباح … اسمعهم يتكلموا عن المسلسل وانا راجع اسمعهم يتكلموا عن المسلسل
سألت أخويا : عمر … ايش قصة المسلسل في المدرسة ؟
يقلي كل اللي في المدرسة يتابعوه !!
حتى مرة جانا مدرس وقعد يكلمنا عن المسلسل !!
أظن اللي باقي كل يوم في اذاعة الصباح يعطوهم ملخص باللي سار
يا ريت لو الموضوع وقف الى هنا وخلاص …
لما أوصل امي لأي مدرسة في العالم أسمع البنات يتكلموا واو زي سيارة نور … واو اللي يبيع في البقالة يشبه مهند !!
وايميلي كل يومين تجيني صور لميس ونور ومهند
وكل ايميل فيه صور غير التانية
ولما انتهت الصور اللي في العالم … سارو يرسلولي اعلانات لميس شامبو اعلانات نور مدري ايش
المشكلة الاعلان بالتركي … اتحدى لو فاهمين حاجة!!
بصراحة انا قبل يومين اكتشفت انهم مسلسلين منفصلين … مو مسلسل واحد
في شي اسمو نور ومهند … وشي اسمو سنوات الضياع
طبعا طريقة الاكتشاف خالتي اتصلت تسألني متى يجي سنوات الضياع ؟
قلتلها في الليل ما اعرف متى على 4
قامت تضحك بصوت عالي
خير ايش في ؟
تقلي انتا تتابع المسلسل اصلا ؟
قلتلها ايوا … حتى لميس مضاربة مع مهند الايام دي
وتضحك اكثر
لين في النهاية شرحتلي واعطتني خلاصة الـ 100 حلقة اللي فاتتني
احس المسلين نفس القصة
بس الفرق واحد فيه جرايم قتل … والثاني شركة تخسر
اللي يقهر من جد … لما يجيني ايميل عن أضرار نور ومهند في المجتمع … ومن الناس اللي مررو الايميل بنت حاطة توقيعها
اللهم ارزقني من يحملني كما حمل مهند نورا
وكاتبة تحت ( آمين آمين آمين يا رب العالمين )
ما أعرف بصراحة هيا من اللي يرسلو بدون ما يقرو الايميلات
ولا ايش القصة بالزبط ؟
المشكلة هيا انو المجتمع سار يتفرج على نور ولميس ومهند ومبسوط وسار لما يمزح ولا يحكي ولا يعلق كلامو عن المسلسلات هذي
طبعا المسلسل من اولو لآخرو لحظات رومنسية حتى وهما يضاربو برومنسية
مو زي مضارباتنا نستخدم اجمل الالفاظ واقوى الاصابات
فيسير مجتمعنا يتكلم عن تفاهة + حاجة مستحيل تتحقق في الواقع
وعاد هذي الاجازة الصيفية القنوات ناوية تستغلها اجمل استغلال وخصوصا ان رمضان فيها
والله يعيننا ولا يبلينا في ديننا
Filed under: صرخة صامتة
شكلك غيران من مهند
المخرج عاوز كدا… مسلسلات كورية وتركية ويابانية ويمكن هندية وإلا صينية في الأخير ظاهرة وراح تتغير زي المكسيكية.
لكن السؤال أيش الفايدة منها وأيش اللي يشد البشرية لها؟
تحياتي؛؛؛
ههههههههههه
ايوا غيران مرة
يا ابو سعد المشكلة مو هنا
المشكلة حتى في المدارس الناس يتكلموا عنها
المكسيكية كانت عيب الواحد يتفرجها
لكن الان سارت عادي
وبعد فترة ترجع المكسيكية ثاني وتكون عادي
انا من كتر ما سمعت عنها
قلت خليني اشوف حلقه
وتابعت حلقه
الحلقه بكاملها حدث واحد وماخلص كمان
يعني مضيعه وقت
بس لمن فكرت فيها قلت يحقلهم الناس ينهبلوا
مو منهم من القرف اللي بينعرض في المسلسلات الخليجيه عندنا
وهي فتره وحاتعدي زي المسلسلات المكسيكيه
في جد جاتوا حفيده سماها لميس على اسم لميس اللي في المسلسل
الله يشغلنا بطاعتوا
هههههههههههههههه
خديجة ذكرتيني بالكابتن ماجد
من بداية الحلقة لاخرها وهوا في السما يشوت الكورة وتنتهي الحلقة ولسه ما نزل من السما
وبعدين يا خديجة احنا ما نقول والله الولاعة تحرق اجل خلينا نستبدلها بكبريت
كلها نار وكلها تحرق
ليه ما ندور بديل يكون ممتع ومفيد ومتوسط
بلاشي نقول عندنا بديل … قناة دينية متعصبة فيها برامج جيدة وتبدأ تضخ الافكار المتعصبة
احنا محتاجين لاعلام معتدل ومدروس … محتاجين ننسى البزنس شويا
والله يحفظ لميس الصغيرة … وتكبر وتحلا اكتر من لميس الكبيرة
أنت ح تقول ..
المسلسل في البداية كان يشد .. بس بعدين سار فيه تفاهة ومضيعة وقت ..
ع قول صحباتي (أوقات الضياع)
اللي مستغربة منه أنو اللقطات بدأت تآخذ مجرى ثاني غير اللي كان عليه في البداية ..
والأطفال تتفرج !!
كان في واحد ولد من أخوان صحباتي صغير ..
يكلموه البنات يخلوه يحكيهم ايش سار اليوم في نور ولا سنوات الضياع ..
وصاحبنا مبسوط ويحكي :s
ايش ح تقول ؟؟
إعلام ياجماعة .. !
في شي أكثر من الاعلام يأثر عالمجتمع ؟
هند ..
ايام ما كنت في الابتدائي كنت في الجبيل
ولما اجي مكة عند جدتي
وكنا ما نطلع من الحوش الا الساعة 5 عشان الشمس وما الشمس
ولما طلعت المسلسلات المكسيكية
كانت الايجابية الوحيدة اللي استفدتها منها انو ماما كانت تخلينا نطلع الحوش من 4 عشان ما اشوفها
انا مو مصدق اللي بيسير دحين
اتزكر ايامنا ما كنا نشوف حاجة في التلفزيون كان كل حاجة ممنوعة علينا
حتى كنا نقول انو ازا كبرنا حنتفرج على التلفزيون براحتنا بدون محد يمنعنا على شي
دحين اشوف الصغار يزكرو الكبار بمواعيد المسلسلات
معد موجودة الرقابة على التلفاز ولا على اي شي
اتذكر لين بداية الجامعة وأمي اول ما تشوف فريندز في التلفزيون تدير على طول
ايش القصة ياهو ؟
عادي جدا.. إطلاع على ثقافات أخرى ومتعة العيش في قصة ما..
…
..
مع إني ما قد تابعت مسلسل على تلفزيون إلا إني شفت أكثر من عشرة مسلسلات بين يابانية وكورية وتايلاندية وكندية وأمريكية.. وأفكر بصراحة في مسلسل تركي وهندي وأندونيسي وغيرهم بلغاتهم الأصلية كوني بنت كلية العلوم الإجتماعية
.. كنت قبل سنوات أعتبرها تفاهة وضياع وقت.. صرت أعتبرها نصف ضياع وقت لكن ما عدت أعتبرها تفاهة..
المشاكل الي قرأت عنها في النت والي حصلت بسبب مسلسل نور هذا كلها الغلط فيها على المشاهد الغبي الي ما يفرّق بين التمثيل والواقع، وأشياء كثيرة وأشياء كثيرة ثانية مختلفة عنها
المشاهد الذكي يستفيد من أي شيء يشوفه بالشكل الي يناسبه أو يتوقف عن المشاهدة إذا ما ظهرت بوادر أي فائدة من أي نوع أو ظهرت بوادر مشاكل..
مسلسل رومانسي؟ غالبا فيه حاجة ممكن نتعلمها كوننا مجتمع رومانسيته ميتة والعمر الإفتراضي للزواج صاير قصير والطلاق الي يهب على البيوت قبل ما تكمل سنتين وارد..
السنة مرتفع عدد الناس اللى بتسافر الى تركيا
والسبب المسلسلين التافهين
معلية سقاف اعترف انك منقهر من ابطال المسلسل وودك انك تكون مكانهم
ودي اعلق عندي تعليق طويل وبقلبي
بس النوم سلطان
واتوقع اني كتبت بما فية الكفاية بمدونتي المصونة
اصحاب العقول في راحة ..
الله يتمم علينا نعمة العقل قولوا امين
أهلا نجاة
يا اختي انا ما اقلك ما نتعرف على ثقافاتهم ولا ما نتعلم ايش هيا الرومنسية ولا غيرو
انا اتكلم عن الطريقة والوسيلة
هل انتي مقتنعة ان الاطفال والمراهقين يتفرجو على هذي المسلسلات ؟
هل انتي مقتنعة ان المدارس تسير مكان لمناقشة المسلسلات ؟
ثاني حاجة …
اللقطات الرومنسية … هذي تعود العين على المشاهد اللي تخدش الحياء
لا تقوليلي ان كلامي مغلوط ولا شي
اليوم مهند شال نور وبكرة مهند يضم نور وبعدو مهند مدري ايش بيسوي
والعين تتفرج وتعتاد
والعقل يبدأ يفكر في العمل وفي كل مكان في هذي المناظر
لين ما نشوفها شي عادي …
المشكلة يا نجاة ان في خطوط حمراء
المفروض ما نعديها
لكن يجي البعض وما يعرف فين بداية الخط الأحمر
ويقول هذي رومنسية فقط
وممكن نستفيد منها
لكن احنا نتكلم عن الضعاف اللي حتى مو قادرين ينكروها
نتكلم عن الصغار اللي يشوفو الشي وما يدرو هل هوا صح ولا غلط
نتكلم عن الشباب اللي سار هذا المسلسل مؤجج لنار الشهوة وشعورهم باحتياجهم العاطفي
واحد من الشباب يكلم بنت …
والبنت اللي يكلمها تجبرو انو يتفرج نور ومهند !!
هل يعني تباه يسوي نفس هذا الشي ولا ايش ؟؟
نقطة أخير يا نجاة
هيا ان حتى لو افترضنا ان هذا المجتمع حيتعلم الرومنسية من نور لان عدد الطلاق مرتفع والمشاكل الزوجية في ازدياد
ما تشوفي ان العقل البشري يتأثر بالمثال ويقطع مجال الابداع ؟؟
يعني أي مثال تعطيه لاي انسان حيحفز العقل في جانب ولكن من جوانب اخرى مح يفكر فيها ابدا
غير كذا ان الناس ما بيشوفوا نور ومهند عشان يتعلمو الرومنسية
بيشوفو نور ومهند وكل مين يقول ليه الطرف الثاني ما بيعاملني نفس المعاملة هذي ؟
انا محتاج لوحدة زي نور تفهمني وتحس بيا وتضحي عشاني
هذا اللي بيسير مع الاسف
أشكرك يا نجاة على مداخلتك المفيدة
نوم مين والساعة 12 ؟؟
احنا في اجازة
هع هع
مضيعة احنا نجذب السواح لنا بطاش ما طاش
هههههههههههههههههه
وانا ميت قهر من مهند … وعلى فكرة انا احلى منو بس انا البس نضارة وهوا لا
هع هع هع
>>>باااااااااااين
إنت عندك فكرة عن نور ومهند أفضل مني..
أنا ما عندي فكرة لسة.. أتكلم عن المسلسلات بشكل عام وأقول ربما!
.. ثم إنها تفضل مشكلة المشاهد..
قلت من أول إنه إذا حس الواحد ببوادر مشكلة من أي نوع عليه يتوقف..
.. بالنسبة لكلامي عن الرومانسية الي ممكن يتعلمها المشاهد.. كنت أعني معناها وأهميتها لا المشاهد والطرق والأمور دي..
ما أدري.. يمكن لأن ثقافتي يابانية اليومين دي.. والمسلسلات اليابانية رومانسيتها يمكن غير؟!
بعدين الي يقارن بين واقعه وشريك حياته والي في الشاشة المفروض ما يتفرج حاجة من أساسه كونه غبي ببساطة..!
والمشاهد غير المناسبة؟ ما تنحذف؟ غريبة.. على بالي تنحدف زي المسلسلات الي أنزّلها من المنتديات العربية..
على أي حال.. لما أشوف مسلسل نور – لما تحج البقرة على قرونها- إن شاء الله أرجع أجاوب على السؤالين الأولى..
ثم على فكرة يعني.. من زمان وأنا نفسي أقول لكل الي جابو سيرة مسلسل نور هذا وعمال ينتقدوه: أفضل وسيلة للدعاية لشيء هي الدعاية السلبية.. على الأقل بالنسبة لي!
نجاة
غيري عندو فكرة افضل مني
متابعتي سطحية جدا
انا معاكي ان الرومنسية مهمة
لكن في طرق للتعلم أفضل من كدا
وبالنسبة للي يشاهدو المسلسل وتتكون عندهم ثقافة غلط
بسبب ان ما عندهم ثقافة
مو كل اللي يتفرجوا ناس مثقفين
في ناس ما يفكروا وناس عاطلين وناس داشرين يتفرجوا ويتاثرو
يحسبوا انهم بكرة اذا اتزوجو حتجيهم وحدة رومنسية لاخر قطرة
ونفس الشي البنات
وبالنسبة للدعاية السلبية
انا معاكي في كلمتك دي …
لكن صدقيني المسلسلات دي مو محتاجة اعلان
وعلى الاقل لما اتكلم عنها يكون اللي يتابعها وقري كلامي حذر نوعا ما
مازلت أشكرك على اثرائك للموضوع
حابة أقول لك سر صغير:
كلما دخلت نقاش خرجت وأنا أشك في قدرتي على التعبير..
..
ثم إنه.. عفوا..
اذا حاسة اني ما فهمت فكرتك … عادي تشرحيها مرة واثنين وثلاثة
ما عندنا شي
لكن اللي انا فهمتو منك
انك تقصدي احنا ممكن بطريقة واعية نستخرج الاشياء المفيدة من المسلسل زي الرومنسية مثلا
وممكن نتعرف على الثقافة الاجتماعية اللي في البلدان اللي تعرض المسلسلات …
هذا اللي انا فهمتو وبناء على هذا كان ردي ..
السلام عليكم
انا من متابعين المسلسل(حاسة حنضرب)
بس لا اخلي عيالوا يتفرجوا ..ولا اختي الصغيرة
في حاجات كتير في التلفزيون تجي وما يصير الأطفال يشوفوها بس وجهة نظري انا بالنسبة لي القصة حلوة واعجبتني سيبك من الي يقول عشان شكله حلو وعشان البنت حلوة انا ما كنت اتابعه من البداية بس جذبتني القصة ..واشوف انه البنات المفروض ما يشوفوه لكن ممكن المتزوجات علشان الي مل من الروتين يتذكر ويغير شوية ونفس الشي للمرأة
يعني انا مؤيده ومعارضة في نفس الوقت خخخخخخ
واعتقد ان كثيرين يتفرجوه لأنه جا غير عن اسلوب المسلسلات الخليجية الي تجيب الهم من النكد حقها
الحمد لله على سلامتك أول شي
بعد كدا نجي للضرب … قصدي الرد
أول شي يا ورد … بصراحة وكلمة حق أقولها لك
اسلوبك في التربية من اروع الاساليب اللي شفتها ما شاء الله تبارك الله
بس اسمحيلي اسالك عن الطريقة اللي تستخدميها عشان تتفرجي فيها المسلسل بدون اولادك الله يحفظهم
لاني عن نفسي كانت تحز في خاطري انهم يبعدوني عن التلفزيون ويتفرجو
وعجبتني كمان نقطة ان الناس يتفرجوه بدال مسلسلاتنا النكدية …
اتفق معاكي فيها
شكرا لك ورد
على فكرة ما ادري ايش صنفلي اليوم اروح البحرين
وحتى لما رحت لقيت في السيف براويز صور لمهند ونور
كنت شويا وحبكي
السلام عليكم
استغربت انك سألتني كيف الطريقة الي اتبعها عشان ابعد اولادي عن مشاهدة هادي الأشياء ؟؟لاتسأل ليه؟؟
المهم انا عادة لما اتفرج شي في التلفزيون وتجي لقطة فجأة مو مناسبة لهم اقلهم ديروا وجهكم ولا غمضوا عيونكم وعلى المسلسل عادي بس اقلهم روحوا العبوا في غرفتكم لغاية ما يخلص المسلسل وكل شوية يطلعوا ها خلص؟ماخلص؟
وبعد ما يخلص اطلعهم واحطلهم كرتون خخخخخ
معليش على السؤال ازا كان مزعج شويا ولا يضايقك …
انا قلت ممكن عندك طريقة معينة تستخدميها
لان هذي الطريقة بصراحة ما احسها فعالة … من واقع تجربة يعني
لما كنت صغير وكانت امي تستخدم هذي الطريقة في البداية كانت ماشية
لكن مع الايام بدأت تضايقني لأنها اولا غير عادلة …
ايش معنى انا ما اطالع والكبار يطالعو ؟
ثانيا لان الفضول يقتلني … ليه ما يبوني اشوف ايش فيها يعني ؟؟
مدري ان شاء الله اكتشف طريقة فعالة
معليش يعني انا داخلة في نص الهرجة ..
اولا الطريقة اللي قلتوها في وجهه نظري غلط .. عارفين ليش لانو الطفل حيفهم منها انو انا صغير شوية بس اكبر يسير معليش اتفرج على كل اللقطات اللي محرم عليا اشوفها ..
وبمعنى تاني حلال عليهم حرام عليا ..
افضل طريقة لنك ماتشوفي اصلا شي فيه مشاهد مو مناسبة وزيك زيهم ولو شفتوا لقطة وكانوا موجودين لازم تعلقي وتقولي : هدولا كفار احنا مسلمين ماعندنا زي كدا او اي تعليق مناسب يبينلهم انه الشي دا غلط ..
امم .. هيا وجهة نظر ع فكرة .. سمعتها من مدرب ومن استاذتي في الجامعة ..
ومعليش عالانبراش
أيانق …
بالعكس حياكي الله
وبعدين نستفيد من خبرتك ومعرفتك من دا المجال
بعدين بالزبط زي ما قلتي انا كنت احس وانا صغير
جابو فلم … يقولولي روح نام يلا …
جا مسلسل روح اخرج العب …
المشكلة ان القانون كان يطبق عليا وبنات خالاتي وحدة اصغر مني ووحدة اكبر كانو عادي يقعدو !!
طبعا كل ام لها طريقة ومبدأ وفكرة
لكن المشكلة ان تعارض الافكار يسبب ارتباك وحيرة للطفل
اذا امي فكرتها صح طيب ليه خالاتي افكارهم غلط ؟ ليه الغلط ماشي عندهم ؟
وهل من الممكن امي تكون غلط ؟
غير كدا زي ما انتي قلتي ان الطفل حيقول بكرة أكبر واتفرج عادي
وهذي ثقافة جابتها لنا القنوات المشرفة من شوتايم واوربت
لما يقولو الفلم التالي للاطفال … او مشاهدة عائلية او 16 او 18 او 18+
سار في نوع من الثقافة ان هذي الافلام ما تصلح للصغار !! … يعني للكبار عادي
انا عن نفسي محتار ولا عارف حل مناسب لهذي المشكلة … وخصوصا مع مسلسلات وافلام كثيرة والتلفزيون ما بيقصر
والكبار ممكن ينشد انتباههم لمسلسل معين او برنامج او فلم
فايش ذنب الصغار
طبعا في حلول تقنية … لكنها من وجهة نظري غير عملية
مثلا اجهزة الرسيفر اللي تحفظ الحلقة وتسجلها … ممكن تكون نافعة
لكن غير عملية بسبب ان الواحد ممكن ما يلحق يتفرج على الحلقة بسبب انشغالو او تكاسل او حاب يشوفها في وقتها عشان لحد يحكيه ويحرقلو الاحداث
في طريقة ثانية … وهيا متعبة ومرهقة نوعا ما لكن احس انها افضل من الاولى
اللي هيا ان الام تنظم جدول معين يمشو عليه الاولاد
هذا وقت الغدا … هذا وقت الدراسة هذا وقت التلفزيون هذا وقت النوم … هذا وقت للراحة
وتراعي وقت التلفزيون يكون خاص ببرامج اطفال حلوة وانصح متابعة الاهل مع ابنائهم للاشياء اللي يشوفوها
وطبعا اوقات ما ينشغلو الابناء بالدراسة او اللعب … يكون هذا وقت مسلسل الام
لكن عيب هذي الطريقة انها غير فعالة في حالة جا شي جديد او غريب في التلفزيون
مدري دي الطريقتين اللي في بالي … وبصراحة مو مقتنع ولا بطريقة
لاعادي انا متفاهمة مع اولادي اقلهم ما يتفرجوا على اشياء الكبار ولما يجي فلم كرتونهم اقلهم ما تفرج على اشياء الصغار ههههههه
واقلهم انه في حاجات تخوف وازا شافوها حيخافوا في الليل وبس
بصراحة يا ملاك …
انتي توفري جو المصارحة مع أولادك ما شاء الله عليكي
وهذا الشي ايجابي …
طبعا الناس مختلفين
لكن انا لما ارد عليكي ارد من ذكرياتي حقة الطفولة … وخصوصا انو مامتي الله يحفظها تستخدم نفس الاسلوب دا
ولما مثلا يقولولي اشياء الكبار
اشوف نفسي كبير واني خلاص رجال
مع اني ما عديت الـ 7 سنين
تعرفي كانت محرمة عليا الافلام المرعبة
لو ايش ما يسير مستحيل اشوفها
اللي سار … اني كنت اضايق من دا القرار
واللي كان يقهرني اكتر ان الكبار يتجمعو ويتفرجو الافلام في الليل امي وبنات خالاتها وخالاتي ومدري مين ومرات يكون في اولاد قدي في السن
وانا اروح انام !!
واللي يزيد من القهر انهم يضحكو بصوت عالي ولا يتكلمو … ولما يصحو يتكلمو عن الفلم
وانا … ما ادري ايش هوا الفلم اصلا …
حتى المسلسلات العربية مرات ما ينسمحلي اتفرجها
طبعا اللي سار اني مرة كنت في الروضة واسمعهم يبو يجيبو فلم مرعب ومني عارف ايش
وطبعا نوموني بدري >>> او ارسلوني على السرير من بدري
وانا قلت طيب حشوف الفلم يعني حشوفو
رحت نمت من بدري وعلى طول بدون اي مقاومة
بس صحيت من بدري ورحت اشوف الفلم لوحدي
اظن لو اني شفتو معاهم حيكون احسن
الفلم كان فكرتو زي دراكولا بس على بنات وفي السنما وكل ما تنعض بنت تسير دراكولا
طبعا انا ولا كنت ادري ايش دراكولا ولا ايش الفلم ولا حاجة
انبهرت من المشاهد اللي قدامي ومن كمية الخيال اللي موجودة في الفلم
طبعا ما خفت الحمد لله ولا شي بس ما كان في احد يقلي انو دا مو حقيقة وان السنما تقدر تسوي دا كلو
بعدين لما صحيت ماما قلتلها اني شفت الفلم … بما انو في جو مصارحة بيننا
هيا خاصمتني وشرحتلي ليه ما اتفرج ومن دا الكلام
والقوانين خفت لكن مو كتير
وشفت بعدها بكم سنة فلم تاني مرعب مع اخويا ونفس الشي في الصباح من بدري
حسيت انو دا مرعب من جد بس خلاص كانت عندي خلفية
لكن اخويا مسكين اخدها على راسو كانت اول مرة وكان الفلم عن ولد دخل فيه الشيطان ومدري ايش
انا ما اقول ان الطريقة اللي اتربيت عليها غلط .. انا اقول ان في افضل منها
انا ليومك دا احب الافلام المرعبة مهما كانت … واذا اتفرجتها اضحك لا اراديا وافطس من الضحك
ما اتعقدت ولا شي
واخواني نفس الشي والحمد لله
لكن لما كبرت ووصلت للمراهقة مثلا … او على اخر المراهقة
كانت امي تمنعني اتفرج على فريندز بس بتوعية
وخصوصا فريندز مليان تلميحات بذيئة ومعليش على الكلمة
لكن بالمقابل كانت تسمحلي اشوف 24 ومرات يكون عندي معهد ولا شي يشغلني وهيا تسجلو ليا مع انو ما يعجبها
نقطة تانية يا ورد …
انا اشوف انو مشاهدة التلفاز الجماعية مرة حلوة
خصوصا برامج الاطفال
وهذي الايام سارت البرامج حقتهم شي يفشل بصراحة
اتخيلي اني اعرف واحد مراهق من كثر مهو متأثر بمسلسل يوغي … مجمع الكروت حقت المسلسل ويلعبها مع نفسو !!
مع ان اللعبة المفروض تكون بلاعبين
هوا يضيع يوم كامل بس عشان كدا
وبصراحة جلست مرة مع اخويا نتفرج ام بي سي 3
بدون مبالغة حسيت ان اللي بينعرض تفاهة في تفاهة
حاولت انسجم بس مافي امل
مسلسل يقلك في مرجيحة تودي لعالم سري
ومسلسل بنات حلوات يبارو البنات الوحشات
غير اخونا يوغي اللي وحوش محبوسة في كروت وطاقتها مدفونة في الاهرام
الدراما خيالية في هذي المسلسلات
طبعا اسهل حل لهذي المشاكل اللي احنا بنتكلم عنها من اول الموضوع اننا نقفل التلفزيون وانتهينا
لكن اذا نبا نكون واقعيين اكثر … لازم نعرف كيف نتعايش مع التقنية ونشوف الطريقة الامثل لاستخدامها
السلام عليكم ورحمه الله وبركاته
بصراحه يسعدني ويشرفني تواجدي في مدونتك ” صارخ الصمت ”
بالنسبة لموضوع نور ومهند و..و..
الفضاوة تعمل المستحيل
يعني شبابنا وبناتنا حتى لو عندهم مشاغل تلقاهم لازم يفضو أنفسهم عشان يتابعو المسلسل
العبره هنا ماهي ” خطر هذه المسلسلات على سلوكيات الأفراد اولا ”
وفراغ العاطفه ثانيا…!
على قولة أمي الله يطول بعمرها ” هذا الجيل ماعرف قلة الأدب إلا من المسلسلات..!
وهي صادقه
والله أعرف ولد عمره 12 سنه يقول امي زوجيني فلانه يووه تجنن والا اقول فلانه تشبه الممثله الفلانيه ….خير ان شاء الله ياحبيب امك خخخخخ
والله صرنا في زمن العجائب والغرائب
أما بالنسبه لي عمر المسلسلات ماكانت من اهتماماتي ابد
يعني لو مدري اش صار ماتنازلت وتفرجت على تفاهات تضيع وقتي ..!!
جوري
بالعكس الشرف ليا بوجودك
وان شاء الله زيارتك تتكرر دايما..
نظرة أمك الله يحفظها صحيحة ومية بالمية
لكن الجيل ما عرف قلة الادب الا من التلفزيون
والسبب اننا ما عندنا وعي حول كيف ممكن نستخدم التقنية … ولا عندنا وسائل لمواجهة قلة الادب اللي بتبث
والله يثبتك على كل خير
شكرا لامتاعنا بوجهة نظرك
السلام عليكم ورحمة الله وبركاته
اخبارك يالسقاف .. ان شاء الله طيب
واخبار العطله معاك ان شاء الله مبسوط
/:/
والله السنه هذي كل الناس ضاعوا
من مهند وسنوات الضياع ..
احس << مجرد احساس
سبب متابعة هالمسلسين بشكل مو طبيعي
الرومنسيه الزايده يعني اللي مايعرف الرومنسيه ويبغى يتعلمهما
يهزء نفسه ويتابع مهند ونور
, وشي ثاني انه جديد عالناس
مسلسل تركي ومدبلج طالع حركه ..:P
يالله كل سنه وطالعين لنا بحاجه
والناس مع الاسف
تمشي وراء كل جديد ,
<< تعجبني لهجتكم مررّه ..:)
الله يعافيهم ولا يبلانا ..
الله يحفظك من كل سوء
سلاااااام ازكى من الريحان
هلا بنت النور
انا الحمد لله بالف خير وصحة
انتي كيفك ؟ ان شاء الله تكوني بخير
أول حاجة … أحب أنبه السادة المشاهدين بأن اختنا .. بنت النور … مالها اي علاقة بنور وما غيرت اسمها لبنت النور لما طلع المسلسل
هههههههههههههههههههههههههههه
والله يا اختي الدنيا ضاعت ….
كم واحد من الشباب رايحين تركيا واسطنبول وما همهم بالمشاكل الامنية هناك
وعلى فكرة … سنوات الضياع و مهند ونور مو اول مسلسل تركي مترجم
كان قبلهم في اكليل الورد …
لكن الرومانسية اللي فيه ما وصلت للمسلسلين السابقين
بالعكس كان عن معنى الرومنسية الحقيقية كيف اثنين حبو بعض مع انهم من طبقات مختلفة وفي حرب وكل واحد فيهم اتعرض لمصايب وما نسي الطرف الثاني خلالها …
ما انشهر زي المسلسلين دول
شي غريب فعلا
شكرا لك بنت النور على مرورك
السلام عليكم ورحمة الله
مساكم ورد……………
واشكر الجميع على الموضوع الأكثر من الرائع …………واحب اشارككم براي
التلفاز سار شئ اساسي في كل بيت يعني شر لابد منه
والكل ملاحظ ضررو على الأسر بشكل خاص وعلى المجتمع الاسلامي بشكل عام
بشكل مختصر احنا قدامنا الوسيله الهادفه والامنه والله انا مجربتها بنفسي وملاحظه اثرها في الاسر الي حولي وهي باقة قنواة المجد والله انها نعمه ومحنا مقدرينها وفيها كل الي يشبع رغباتنا للكبار وللصغار وهي مثال رائع للاعلام الاسلامي الهادف ومساعد اول للاسره على تربية الابناء
وبمكانكم تجربتها فتره بسيطه واذا ما عجبتكم تزيلوها لان القنوات باشتراك شهري
الله يوفق كل العاملين عليها ويسدد خطاهم للخير الدائم
اتمنا تتقبلو مداخلتي وما يكون دمي ثقيل عليكم
حياكي الله يا توتا …
نورتي مدونتي المتواضعة
وأشكرك على مساعدتنا في ايجاد البدائل
بالفعل قناة اقرأ وقنوات المجد وغيرها من القنوات الاسلامية حتحل مشكلتنا مع المسلسلات هذي
وأتمنى من المسؤولين على هذي القنوات ان يزيدو من اهتمامهم بهذه القنوات أكثر
شكرا لك أختي
سعدت بمرورك
السلام عليكم ان فلم سنوات الضياع و نور جننوا الناس و حتى انا ….. و ربما انتم فهم تركيين و ربما هذه هي حياتهم لاننا نحن العرب لا نعرف نتصرف مثلهم هن الاحسن و زائد هذا هل شاهدتم الاشهار ..
لميس و مهند هم لابئين لبعض كتييييييييييييييييييييييييييييييييييييييييييييييييييييييييييييييييييييير
وعليكم السلام ورحمة الله وبركاته
كل شي جايز يا فارسة
لكن انا اتكلم عن التأثير الجنوني
وحتى بعد ما اتاثر شبابنا وبناتنا ما خرجنا بشي جديد
نفسنا نفسنا … ومحلك سر
شكرا لك